N’hao nuih n’hâm tâm rom gop, tâm rŏng tâm nau kan n’jrăng, n’gang nau ji tưp Covid-19

Lôch nar rbŭn, wa Bí thư N’gor ủy Ngô Thanh Danh lĕ nkah, yor nau ji tưp abaơ gĕh âk nau jêr, mô dơi gĭt rĭ aơ ta ăp bon têh n’hanh ăp n’gor lam bri dak n’hanh bri Drôn, ăp n’gâng kan ta ăp n’qual, ăp ntŭk kan ksiêm mât nê nê bu nuyh hăn n’hanh sĭt ta Dak Nong tă bơh ăp mpeh gĕh nau ji n’hanh ăp n’qual gĕh n’har bri đah Drôn.

N’gâng kan Mât rdeh Rdeng drăp ndơ hăn rŏ trong ksiêm bu nuyh bĭt rdeh khach, rdeh rdeng drăp ndơ luh, lăp tâm n’gor. Ðah nau dăn kan r’văt máy ECMO (kỹ thuật play nuih n’hanh klơm soh nhân tạo), N’gor lĕ dơi ân r’văt n’hanh jao Ủy ban bon lan n’gor ndrel N’gâng Y tế uănh n’hanh r’văt dơi dŏng n’jrăng n’gang nau ji tưp.

N’gâng kan Ntĭm gai n’jrăng, n’gang nau ji tưp ăp ntŭk kan tĕng nô nau ji tưp gĕh ma mô gơi ân bu nuyh bon lan gŭ êng tĕng nau n’hêl, đăp mpăn nau mât, yông nau nchih mbơh bu nuyh bu ân gŭ êng lah ăp bu nuyh bu ân gŭ êng ta wâl gơi n’jăng n’gang nau ji.

Bí thư N’gor ủy Ngô Thanh Danh r’nê, lah uĕh nau tâm rŏng bơh rdeh tâm rom gop rdeng kơl drăp ndơ ân ma bu nuyh bon lan mpeh gĕh nau ji ta Bon têh Hồ Chí Minh. Tă bơh aơ, ăp n’gâng kan, ntŭk kan, ăp phung kan, ăp n’qual n’hao tay nuih n’hâm tâm rom gop, tâm rŏng bu nuyh Dak Nong ân ma bu nuyh bon lan ta mpeh gĕh nau ji.

* Ndrel ma ôi lơ 28/6, N’gâng kan Ntĭm gai n’jrăng, n’gang nau ji ta kon bu nuyh n’gor Dak Nong rbŭn nchră n’hao nau pah kan n’jrăng, n’gâng nau ji tưp Covid-19 ta ăp nar abaơ.

Yor nau ji tưp Covid-19 gĕh âk nau jêr, Groi Kô ruanh Ủy ban bon lan n’gor Tôn Thị Ngọc Hạnh lĕ đă ăp n’qual n’hao nau kan mât uănh bu nuyh bon lan, ntŭk rêh bon lan n’hanh rơm nŭm ngih wâl, ndơ dŏng y tế ma nau kan n’jrăng, n’gang nau ji tưp.

Ăp n’gâng, ăp ntŭk kan gĕh nau nau, nau nchră kan n’jrăng, n’gang nau ji tưp nê nê, tâm nĕ nkah can bộ, kông chức, viên chức, bu nuyh pah kan tĕng kơt kan ân di nau n’hêl n’jrăng, n’gang nau ji tưp, tải n’hanh dŏng ứng dụng Bluzone ta điện thoại.

Ndrel ma nau ndâk njêng kịch bản nti n’jrăng, n’gang nau ji tưp gơi gĕh nau pah kan uĕh lah gĕh nô nau tât, n’gâng kan Y tế mât dŏng ân di văc xin, ndâk nau kan ntâp dak si ân di bu nuyh n’hanh n’hao nau kan mbơh ntĭm mĭn gĭt nau n’jrăng, n’gang nau ji tưp.

Rdeh tâm rom gop rdeng drăp ndơ “Tâm kơl n’hâm suan bư trŭnh nau ji tưp Covid-19” rdeng 20 tân ndơ sa kơl bu nuyh bon lan Bon têh Hồ Chí Minh. Ảnh Đặng Hiền

Ăp bu nuyh kan kơl n’hâm suan tâm n’qual Tuy Ðức pĕ rpuăl kơl kơl bu nuyh bon lan Bon têh Hồ Chí Minh. Ảnh Đặng Hiền

N’gâng kan Ntĭm gai n’jrăng n’gang nau ji ta kon bu nuyh n’gor Dak Nong ksiêm ntŭk bu ân gŭ êng ta n’qual Dak N’Soong. Ảnh Hồng Duyên

Bảo Ngọc

Bảo Ngọc