Pah kan tay n’jrăng n’gang nau ji tưp Covid-19 lĕ nuih n’hâm, dơn nau kan kh’lay ngăn ngên

Mpôih ka han Mât n’har bri Dak Lao (Dak Mil) n’king, mbơh ntĭm bu nuyh bon lan n’jrăng n’gang nau ji tưp Covid-19. Ảnh Phan Tân

Tĕng nau mbơh aơ, abaơ tâm lam n’gor Dak Nong mô hŏ gĕh bu nuyh dương tính ma Covid-19. Nau kan ntâp dak di n’jrăng nau ji Covid-19 tâl 2 dơi ndâk kan uĕh, abaơ lĕ ntâp gĕh 11.200 nglai tâl 1, gĕh kan tâm 86%.

Tĕng n’gâng Ntĭm nau kan n’jrăng, n’gang nau ji tưp ta bu nuyh lĕ đăp ăp n’gâng, ăo mbuch kan, ăp ntŭk kan n’hanh ăp n’qual ndâk nau pah kan n’jrăng, n’gang nau ji tưp tât tâm n’gor, tâm nĕ gĕh nau kan rlu rdeng ăp bu năch tă bơh ăp n’gor gĕh nau ji tât tâm n’gor he, jêh rĭ đă bu nuyh bon lan mbơh nau kan y tế điện tử ta phần mềm điện tử.

Lôch nar rbŭn, Bí thư N’gor ủy Ngô Thanh Danh đă ăp n’gâng kan, ăp mbŭch kan, ăp n’qual n’hao uĕh nau pah kan ndrel, lăp pah kan n’jrăng nau ji tưp Covid-19  lĕ nuih n’hâm, dơn nau kan kh’lay ngăn ngên.

Bơh đah nau kan mât nê nê nau n’jrăng n’gang nau ji tưp ta ăp mpeh n’har bri, n’gor rlu rdeng bu năch tă bơh ăp n’gor gĕh nau ji sĭt tâm n’gor.

N’gâng kan Y tế pah kan ntâp dak si n’gang nau ji tĕng nau nchră kan, pah kan ân ngăch, pah kan ân di, nŭm n’hanh rơm nŭm ăp ntil ndơ dŏng, dak si ta ăp mpeh n’har bri gơi wơt bu nuyh Việt kiều sĭt cách ly di nau n’hêl.

Ủy ban bon lan n’gor đă N’gâng kan Ntĭm bư mir jan ba n’hanh Hao nau rêh bon lan ndâk nau rbŭn nchră nau kan gơi kơl bon lan tăch r’văt drăp ndơ gĕh tăm jêh rĭ pah kan ndrel ma Mặt trận, ăp phung kan pơk nau kan tăch drăp ndơ tâm rŏng gơi kơl bon lan ta mpeh gĕh nau ji ta bon têh Hồ Chí Minh.

Bảo Ngọc

Bảo Ngọc