Nau knơm knang âk ta N’gâng kan Chăm gai Ðảng bộ n’gor Dak Nong tâ XII

Che K’Ngai (bu nong Mạ) Giám đốc Wâl prăk Yơh ndi-Nau rêh bon lan n’qual Dak Rlâp

“Gơi n’hao tay ân uĕh nau kan kơl ân bon lan manh prăk tâm n’gor n’kôch ndrel, n’qual Dak R’lâp lah êng, gâp ŭch dăn n’gor pah kan tay ân uĕh Nau ntĭm gai mrô 40-CT/TW bơh N’gâng kan Bí thư Trung ương đảng tâm nau pah kan kơl ân bu nuyh bon lan dơi manh prăk; sâm kơl, pơk huy nau kan kơl ân sinh viên, r’năk bon lan bu nong iê bu nuyh, r’năk o-ach dơi manh prăk gơi bư mir jan ba, ndâk njêng bon nkra nau kan. Bơh đah nĕ, rlau năm rlau r’gâl uĕh nau kan ân manh prăk âk tay, pơk huy nau kan gơi bu nuyh bon lan dơi manh prăk bư mir jan ba, tăch rvăt drăp, gơi bu nuyh o-ach gĕh ntŭk n’sing, bu nuyh gĕh nau rêh jêr jŏk hao tay nau kan n’hanh pơk têh nau kan, n’sĭt tay prăk rêl tâm nau pah kan ôi mhau, n’hao uĕh nau rêh”.

U Thị H’Nhó, tă kan bư Groi Kô ruanh Ủy ban bu nuyh bon lan n’qual Dak R’lâp

“Gâp knơm knang, N’gâng kan Chăm gai Ðảng bộ n’gor gưl XII trĕng kơl pah kan tay ân uĕh ăp ntil trong leo kan, nau kơl n’hanh nau mĭn, gĕh nau plăch r’gâl mhe tâm nau rêh bon lan bu nong iê bu nuyh mpeh ngai, mpeh vêch, mpeh bon lan bu nong iê bu nuyh. Ðảng, Bri dak ndâk tay nau kơl mât mray nau way bu nong, trĕng kơl njêng phung kan bộ tơm bu nong iê bu nuyh; ndâk nkra lĕ r’ngŏch trong hăn, điện dŏng, wâl sam bŭt, wâl dak si gơi bon lan gĕh ntŭk nsing bư hao nau wăng sa, n’sĭt tay prăk rêl tâm nau kan, r’gâl tay nau rêh”.

Yuh Vi Thị Thảo Quyên (Bu nong Nùng), Ủy viên Ủy ban Ksiêm N’gor ủy

“Ŭch dăn n’gâng kan ủy gưl kan mhe bư tĕng kan nê nê tâm ăp ntil nau nchră, ntil nau mĭn kan gơi ndâk nau kan ân di. Ntơm bơh nĕ pah kan ân dơi mô rĭ dơi rlau nau nchră tâm ăp ntil nau n’hêl lĕ dơi trŭnh. Jêh rĭ, gâp ŭch ăp kan bộ bu nong iê bu nuyh rlau nar rlau dơi pah kan âk ta n’gâng kan ủy ta ăp đảng bộ, tâm nĕ gĕh bu nuyh kan dăch ma bon lan, tâm ăp bon lan”.

Yuh H’Hương Niê (R’đe), Bí thư N’qual đoàn Krông Nô

"Gâp ŭch dăn N’gâng kan Chăm gai Ðảng bộ n’gor tâ XII trĕng kơl tay nau pah kan rbŭn phung druh ndăm, tâm nĕ gĕh phung druh ndăm bu nong iê bu nuyh; dăn n’gor kuăl jă ăp phung bơh tăch ndâk njêng nau kan ta ăp mpeh, ntŭk kan kông nghiệp gơi phung druh ndăm gĕh nau kan đăp mpăn ta bon lan. Bơh đah nĕ, uănh kh’lay ndâk njêng phung kan bộ tơm bu nong iê bu nuyh, kan bộ bu ur n’hanh joi dăp nau kan ma sinh viên jêh nti sam bŭt ndâk njêng nau rêh, ndâk njêng nau kan, gơi joi gĕh nau kan, gĕh ntŭk phung druh ndăm nti ren, nsrôih pah kan hao tâm nau rêh”.

Nô Ðiểu Hùng (Bu Nong), Kô ruanh N’gâng kan Ndâk nau pah kan N’qual ủy Tuy Ðức

“He dơi lah N’gâng Chăm gai Ðảng bộ n’gor gưl XI, năm kan 2020-2025 lĕ rơm joi bu nuyh bư kô ruanh nŭm r’noh, gĕh nau blau n’hanh tâm di tĕng ăp ntil nau kan. Yor nĕ, gâp gĕh nau ŭch tâm nuih n’hâm ta nau kan joi sŏk bu nuyh pah kan mhe ta tâ rbŭn lĕ dơi bu ruah aơ. Gâp ŭch dăn, ŭch ăp wa dơi bu ruah kan ta gưl ủy mhe mra ndjôt bôk, ntĭm gai bư tĕng uĕh Nau n’hêl bơh năm kan gưl mhe, njŭn n'gor Dak Nong rlau nar rlau hao”.

NHÓM PHÓNG VIÊN

NHÓM PHÓNG VIÊN